GALWAD AGORED: Ffosfforws 9
Mae Cyhoeddiadau’r Stamp yn gwahodd beirdd i anfon eu cerddi er ystyriaeth i’w cyhoeddi yn rhifyn Hydref-Gaeaf 2026 cyfnodolyn FFOSFFORWS. Mae’r cyhoeddiad hwn yn agored i gerddi o bob math ac ar unrhyw thema. Rydym yn croesawu’r caeth a’r rhydd, y traddodiadol a’r avant garde; fel bob amser, rydym yn arbennig o awyddus i dderbyn gwaith sy’n arbrofol o ran thema, ffurf ac arddull, a gwaith gan feirdd o gefndiroedd sydd wedi’u lleiafrifo.
Darllenwch y gofynion cyflwyno yn ofalus cyn anfon eich gwaith at cyhoeddiadau.ystamp@gmail.com, gan nodi FFOSFFORWS 9 fel pwnc. Gallwch hefyd anfon eich cerddi trwy’r post i Bron Llewelyn, Lon Ceunant, Waunfawr, Caernarfon, LL55 4SD, erbyn y dyddiad cau.
Golygydd gwadd: Dafydd Owain
Golygyddion cynorthwyol: Grug Muse & Iestyn Tyne
Dyddiad cau: HANNER NOS, DYDD SUL 23 AWST 2026
GOFYNION
Gofynnir i chi gyflwyno hyd at 3 cerdd unigol neu un dilyniant o hyd at 3 cerdd. Ni fyddwn yn dewis mwy nag un gerdd gan un bardd oni bai am gyhoeddi dilyniannau.
Nid oes cyfyngiad ar hyd cerddi unigol. Yn achos cerddi sy’n hwy na 60 llinell, fodd bynnag, mae’r golygyddion yn cadw’r hawl i ddewis detholiad os bydd angen.
Dylai’r cerddi fod yn waith gwreiddiol y sawl sy’n eu cyflwyno, ac ni ddylent fod wedi eu cyhoeddi mewn mannau eraill eisoes. Ni chaniateir unrhyw ddefnydd o dechnoleg DA (Deallusrwydd Artiffisial) wrth gyfansoddi.
Oherwydd ymarferoldeb argraffu cerddi gweledol (e.e. cerddi collage neu ffoto-haiku) trwy ddull risograff, cerddi testun yn unig y byddwn yn eu derbyn ar gyfer Ffosfforws y tro hwn. Cysylltwch os oes gennych unrhyw gwestiynau am hyn.
Caiff y cerddi eu dewis gan y golygydd gwadd, gyda chefnogaeth y ddau olygydd cynorthwyol; bydd y broses o ddethol yn cael ei gynnal heb i’r golygydd gwadd weld enwau’r beirdd, er mwyn sicrhau diduedd-dra.
Bydd penderfyniad y golygyddion yn derfynol, ac ni fyddwn yn cynnig sylwadau yn ddiofyn ar gerddi a wrthodir.
Gofynnir i chi gyflwyno cerddi yn eu ffurf derfynol; ni fyddwn yn disgwyl i chi ailddrafftio gwaith a ddewisir, ond gallwn gynnig awgrymiadau gramadegol. Byddwn yn darparu proflen i chi ei gwirio cyn argraffu.
Byddwn yn cynnig cydnabyddiaeth o £15 am bob cerdd neu ddilyniant a gyhoeddir yn Ffosfforws. Byddwch yn derbyn manylion ar gyfer hyn yn dilyn ein penderfyniad.
Anogir beirdd nad ydynt yn gyfarwydd a Ffosfforws i gael golwg ar rai o rifynnau’r gorffennol er mwyn cael syniad o ffurf ac arddull y gyfrol. Gellir dod o hyd i fersiynau digidol a phrint yn ein siop ar-lein. Pob lwc!